Mwen pa konn danse,
men pawòl mwen yo
se yon yanvalou pou ou

Michel-Ange Hyppolite
(Otawa, Kanada )

Fòs danse tradisyon Yanvalou se Danbala / Ayida

Mwen pa konnen danse.

Si yon moun ta mande mwen kisa ki atire mwen nan espas nou ye la a? Mwen va reponn: Prezans mwen isit la soti nan pasyon mwen pou lekriti, pou kilti pèp ayisyen epi pou lang kreyòl la, prensipal motè kilti sila a sou divès fòm li yo.

Alaverite, nan espas nou ye la a, se pa danse senpman ki alonè.

Genyen lapawòl nan divès dimansyon: Pwezi, filozofi, fondas sakre, elatriye. Se yo tout ansanm swivan pwòp kadans yo ki ap kata nan lespri mwen, yon fason pou mwen danse ak mo mwen yo, pandan mwen ap envite lòt moun, ki renmen atizay, vin rantre nan wonn pou yo envante mo ansanm ak mwen pandan nou ap envite menm mo sa yo nan yanvalou lavi nou...

Si danse genyen tout eleman pou bay kò nou, nanm nou, fondas nou, fòm finès avèk lapratik, pisans lapawòl ki nan espas nou ye la a, se yon sous ki gen pouvwa gani nou latètopye ak divès kalite plimo lakontantman.

Se pasyon mwen pou bèl pawòl avèk ladrès ki ban mwen zèl jouk mwen rive isit la, yon fason pou mwen rekreye lavi apati pwòp motivasyon mwen pou lanmou nan baryè lavi.

Lanmou pou lavi.

Lavi nan lanmou.

Epi viv lanmou ak lavi.

Nou nan yon gwo lakou kote lapanse gen pouvwa tire fedatifis pou nou trase vèvè lakontantman tout koulè nan syèl kè nou.

Mwen pa konn fè desen, men mwen aprann kite chak liy yon bèl tablo mache libelibè, fè piwèt, simen valeryann alamòd pyepoudre sou tout longè boulva apresyasyon mwen.

Lavi ak lanmou enfini se fòs pou mwen bay nanm mwen gabèl. Kite li pale langay...

Langay pasyon.

Langay pasyans.

Langay lavi.

Lavi nan lenfini.

Amoni tan an. Tan pou nou rekreye womans avèk kadans nan laviwonn pasyans aktif.

Isit la, nou kab kreye pasyon pa nou ak ladrès natif natal pou nou rekreye pwòp tèt nou pandan nou ap reviv lanvè lavi.

Landwat lavi, se fasilite ki pèmèt tout noumenm, tout rèv nou rantre nan jaden reyalite, kote nou se kiltivatè, jadinye, gadyen lawouze epi tèt sous ki ap ponpe tout kalite plezi.

Lanvè lavi, se yon atant enfini.

Lanvè lavi pou ou, se landrèt la pou moun ki anfas ou a.

Lanvè ak landrèt lavi se menm noumenm lan ki ap vire won avèk lespwa lanvè va chanje pozisyon pou li rantre sou chemen landwat. Se tankou nou aprann pasyans pou nou rapouswiv chemen pasyans ak yon pasyon san fen.

Se tout kalite revè sa yo ki vare sou mwen lè mwen ap swiv konpayèl nanm mwen pou nou danse lavi nan amoni lanmou.

Se plezi sa a mwen vle pataje ak nou.

Yon plezi lapawòl pa kab defini. Se yon plezi aktif alenfini nan tout dimansyon nou vle mennen li. Si nou kanpe ap swiv, li ap senpman pase kite nou nan menm plas la. Lè nou va resezi nou, nou va gen pi plis bras pou nou fè sou chemen ratrapay.