Pataje kadanse w pou lavi! 

Pawòl pou ou...

Vèvèy kadanse nou pèmèt nou viv eritaj zansèt yo kite pou patrimwan nou

Onè: Kadanse Revolisyon Lanmou ak Respè > Vèvèy Kadanse ekri pa  Turenne Joseph (Tilarenn Solèy)

Vèvèy mèvèy kadanse tout rit nan lemonn toujou kenbe, nan jounen jodi-a, eritaj zansèt yo. Enèji vital nou pèmèt nou ranmase esans yo epi viv kokenn eritaj zansèt yo sere nan patrimwan nou.

Vitalite yo pran elan nan mouvman nou pou nou fè kò ak mèvèy rasin nou, mete nou djanm kè, kò, tèt, lespri ak nanm.

Vèvèy kadanse nou pèmèt nou, san nou pa deplase lwen, viv tout kokenn mouvman kadanse toupatou sou planèt la, nan espektak, espò, divètisman, mizik, video, sinema, epi menm jwèt kadanse.

Nou gen pou nou konprann tout valè vèvèy kadanse nou ak memwa tradisyon kadanse.

Kilès ou kisa ki vin nan lespri w ?

  • demonstrasyon majorèt
  • Jozefine Baker
  • kadanse nan lari
  • konpetisyon espò danse
  • Micheal Jackson
  • patinaj atistik
  • video popilè

Nou ka kontinye san rete!

Vèvèy kadanse nou gen prezans si tèlman fò!

Tout bon vre, se mèvèy pou zye, zantray, kò, kè, tèt, lespri ak nanm nou.

"Tanbou nago roule nan san'm pou reveye Ogou'' 

 ~  Patrick Sylvain


Rit nan lemonn kadanse mèvèy

Son rit toupatou sou planèt la fè echo nan kè tout moun.

Pèsònn pa janm rete ensansib anba rezonans mèvèy sila a.

Nou koute rit. Nou repete rit. Nou aprann leson rit. Nou kreye avèk rit. Nou kadanse rit. Nou aprann kadanse rit.

Rit anrasine nan fondas nou depi anvan nou fèt epi l ap kontinye vibre anndan tout nanm ak zantray nou jouk nan peyi san chapo.

Nou fouye nan enspirasyon ak souvni pou nou kreye sa ki nèf epi voye monte eksperyans moun doubout nou ak eksperyans espirityèl nou. 

Mòd kreyativite sa a, pa janm mande rete.

Rit toupatou sou planèt la ap travèsè tout fwontyè lib elibè.

Vèvèy kadanse nou se jwayo, nan tout kwase chemen, ki chaje ak konkenn chenn siyifikasyon, sekrè, maji epi anpil trezò.

Atis yo, andeyò ou sou sèn yo ap jwi ou yo kreye, anonim ou selèb, gen yon istwa lanmou yo ap viv nan bay divètisman pou lakontantman kèlkeswa moun nan.

Kreyativite sou sèvis valè atizay epi pèfeksyonman talan leve kouvèti sou yon pakèt richès, sou plizyè dimansyon.


Vèvèy kadanse nou se vwayaj enèji patrimwan kiltirèl mondyal nou

Vèvèy kadanse nou se tankou bay lodyans. 

  • nou kouvri anpil objektif
  • nou bwote mesaj ekstraòdinè atravè lemonn
  • nou rejwenn bezwen nou tout, anvi nou ak entansyon entim nou 

Tout bon, vèvèy kadanse nou se bay lodyans avèk yon lòt mwayen kominikasyon pase lapawòl ki se vwayaj enèji patrimwan kiltirèl mondyal nou.

Esans vèvèy kadanse nou gen konkenn fòs ak fasilite pou li touche nou nan estad primè ak nan piwo santiman nou.

Yon pwovèb afriken di:

"Lè tanbou frape, tout mask tonbe"

Listwa vèvèy kadanse nou ap fèt epi refèt ak chak jenerasyon nan yon ekonomi global kote enfliyans toupatou ap travèse tout planèt la.

Atis pa nan mezire pou chèche konnen lòt kilti epi rekonekte ak sa ki ansyen.

Anmenmtan, yo initye travay tounèf, toujou orijinal, pou fè lemonn... 
ri, kriye, reve, sezi, konekte, panse, dekouvri.


prezans total nou depase rèv nou alenfini | pleine présence au bout de nos rêves à l'infini | mindful presence beyond our wildest dreams to infinity

ONÈ ! Mwen se Turenne / Tilarenn Solèy ! Nou nan pataj sou byennèt inivèsèl ak lafòm total entegral. Nou jwenn yo sou kadans pwisans konsyans mouvman nou nan swen tèt nou pou konkèt tèt nou. Nou kadanse revolisyon lanmou ak respè pou ekilib epi amoni alawonnbadè.

Nou se youn ak kadans latè, linivè epi lenfini.
Tout bagay kadanse paske lavi se kadans. Kadans se mouvman. Mouvman se lavi. Mouvman prezans total nou se sous ekilib ak amoni depase tan.

Fokis Enèji lavi mwen pou nou: kadanse Lanmou ak Respè alenfini.

Onè Legba; Onè Zansèt nou yo;

Nou louvri pòt. Nou ede nou mete tout baryè atè. Nou ede nou kreye kannal kominikasyon lib. Nou ede nou bay kominote nou otonomi pou nou toujou grandi ak pasyon epi kreyativite pou nou fè epi refè ekilib lavi a.

Nou ede nou soutni epi enspire kominote moun ki toujou kanpe djanm pou nou kadanse ekilib ak amoni alawonnbadè.

Nou ede nou pou nou toujou edike tèt nou pou nou vibre ak prezans total nou sou kadans konsyans mouvman nou. Nou ede nou soutni kominote nou nan respekte esans pwisans swen tèt nou pou konkèt tèt nou. Nou ede nou pou nou toujou konpayon ki merite konfyans tout moun nan lidèchip pou nou kenbe angajman nou djanm.

Nou ede nou libere tèt nou pou nou pa janm pè. Nou ede nou vwayaje kè kontan pi bon kote pou nou aprann jwenn toujou plis ekilib ak amoni nan tout bagay.

Nou ede nou louvri chemen pou pitit fi ak pitit gason nou yo byen nan kè, kò, tèt, lespri ak nanm. Konsa n ap jwi richès lavi a ak entegrite epi kite eritaj revolisyon lanmou, respè ak abondans pou tout jenerasyon.




Kòmantè! Commentaires! Comments!

 Pataje lide w.../   Partage tes pensées.../   Share your thoughts.../